အင်းတော်မြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် နှစ်ပတ်လည်နေ့ အခမ်းအနား စည်ကားသိုက်မြိုက်စွာကျင်းပ

လေပွေနီ(အင်းတော်)

          စစ်ကိုင်းတိုင်းဒေသကြီး ၊ ကသာခရိုင် ၊ အင်းတော်မြို့နယ် ၊ အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ၂၀၁၃-ခုနှစ် ၊ နိုဝင်ဘာလ (၇)ရက်နေ့ ကျင်းပသော နှစ်ပတ်လည်နေ့ အခမ်းအနားသည် ယခင်နှစ်နှင့်မတူပဲ ရုံးဝန်ထမ်းများနှင့် ကျေးရွာအုပ်စု အုပ်ချုပ်ရေးမှူးများ ရပ်ကျေးစာရေးများ တက်ရောက်ကာ စည်ကားသိုက်မြိုက်စွာကျင်းပခဲ့ကြောင်း သိရသည်။

          အဆိုပါ ပြည်ထဲရေးဝန်ကြီးဌာန မြို့နယ်အထွေထွေအုပ်ချုပ်ရေးဦးစီးဌာန နှစ်ပတ်လည်နေ့ အခမ်းအနားကို

မြို့နယ်အုပ်ချုပ်ရေးမှူး ဦးရဲမင်းအောင် နှင့် မြို့နယ်ဒုတိယအုပ်ချုပ်ရေးမှူး ဦးမင်းမင်းလတ် တို့နှင့်အတူ မြို့နယ် အတွင်းရှိ ဌာနဆိုင်ရာ အကြီးအကဲများ ၊ ရပ်ကွက်ကျေးရွာ အုပ်စု အုပ်ချုပ်ရေးမှူးများ ၊ နယ်စာရေးများနှင့် ဖိတ်ကြားထားသူများ စုစုပေါင်း ပြည်သူလူထု အင်အား ၁၅၀ ကျော်ခန့် တက်ရောက်ခဲ့ကြကြောင်း သိရသည်။

          ……. အခုလို နှစ်ပတ်လည်နေ့မှာ ပျော်ပျော်ရွှင်ရွှင်နဲ့ ကျင်းပတာလေးကို ကျွန်တော်တို့ ကျေးရွာအုပ်စု အုပ်ချုပ်ရေးမှူးတွေအနေနဲ့ အတော်လေး ၀မ်းသာဂုဏ်ယူမိပါတယ်။ ဘာကြောင့်လဲဆိုတော့ နှစ်စဉ်နှစ်တိုင်း ကျင်းပတဲ့ နှစ်ပတ်လည်နေ့အခမ်းအနားမှာ အခုလောက် ပျော်ရွှင်မှုတွေ မရှိခဲ့ဘူး။ ဒီနှစ်ကတော့ တကယ်ကို ပျော်စရာကောင်းပါတယ်။ ပျော်စရာကောင်းတဲ့ အကြောင်းလေးတွေကတော့ တစ်ခြားကြောင့်မဟုတ်ပါဘူး။ အခမ်းအနားမစခင်မှာ ကျွန်တော်တို့ အုပ်စုအုပ်ချုပ်ရေးမှူးတွေကော အနယ်နယ်အရပ်ရပ်က ၀န်ထမ်းစာရေး တွေကော ဖိတ်ကြားခံထားရတဲ့ ဧည့်သည်တော်တွေကော အားလုံးကို ထမင်းဟင်းတွေကို အ၀ကြွေးပြီးမှ ကြိုဆို ပါတယ်။ ကြိုဆိုတဲ့ပွဲကိုတော့ အင်းတော်မြို့နယ် ဒုတိယအုပ်ချုပ်ရေးမှူး ဦးမင်းမင်းလတ်က ဦးဆောင်ပြီးမှ ကြိုဆို ခဲ့ပါတယ်။ နောက်ပြီးတော့ ထမင်းဟင်းကျွေးတာတွေ ပြီးသွားပြန်တော့လည်း အခမ်းအနားကိုတော့ မွန်းလွှဲ ၁း၀၀ နာရီအချိန်မှာ စတာဖြစ်ပါတယ်။ အခမ်းအနားမှာပဲ ကျွန်တော်တို့ တက်ရောက်လာတဲ့ အုပ်စု အုပ်ချုပ်ရေးမှူး တွေကော ရုံးဝန်ထမ်းတွေကော နယ်စာရေးမတွေကော တစ်ဦးမကျန် အပျော်တမ်း ကံစမ်းမဲလေးဖေါက်တာကို မဲနှိုက်ကြတာဖြစ်ပါတယ်………ဟု အင်းတော်မြို့နယ်အတွင်းရှိ ကျေးရွာအုပ်စု အုပ်ချုပ်ရေးမှူး တစ်ဦးက ပြောပြခဲ့သည်။

          အင်းတော်မြို့နယ်အတွင်းရှိ မြို့နယ်အထွေထွေအုပ်ချုပ်ရေး ဦးစီးဌာန အစည်းအဝေးခန်းမတွင် နှစ်ပတ်လည်နေ့ အထိမ်းအမှတ်အဖြစ် ကံစမ်းမဲများ စုပေါင်း မဲနှိုက်ရာတွင် ဗလာမပါသော မဲများဖြစ်သည့်အတွက် ကြောင့် ယခုနှစ်ပတ်လည်နေ့သည် ယခင်နှစ်များထက် ပျော်စရာကောင်းသော နှစ်ဖြစ်ကြောင်း သိရသည်။

          …… ပျော်စရာတော့ကောင်းပါတယ်။ ဒါပေမဲ့လည်း မဲနှိုက်လို့ ပေါက်လာတဲ့ဟာတွေက ဓာတ်ဘူးတို့  ၊ နာရီတို့ ၊သနပ်ခါးဘူးတို့ ၊ မိတ်ကပ်ဘူးတို့ ၊ ခေါင်းလျှော်ရည်ဘူးတို့ ဆိုတော့ တန်ဘိုးကတော့ မရှိလှပါဘူး။ စိတ်ချမ်းသာစရာ ပျော်စရာတစ်ခုလို့ ဆိုရမှာဖြစ်ပါတယ် ။ ကျွန်တော်ကတော့ အခုကျွန်တော်ပေါက်လာတဲ့ဟာ ကျွန်တော့်အိမ်က ဇနီးအတွက်တော့ အဆင်ပြေပါတယ်။ ဘာကြောင့်လဲဆိုတော့ မိတ်ကပ်ဘူး ဖြစ်နေလို့ပါ။…….. ဟု ယင်းကံစမ်းမဲနှိုက်သူ အင်းတော်မြို့နယ် သောင်မြင်းကျေးရွာအုပ်စု အုပ်ချုပ်ရေးမှူး ဦးဝင်းမောင်က ထပ်မံပြောပြ ခဲ့သည်။