နေကိုကို(အင်းတော်)
စစ်ကိုင်းတိုင်းဒေသကြီး ၊ ကသာခရိုင် ၊ အင်းတော်မြို့နယ်အတွင်းရှိ
အချို့ စီဒီအမ်အေဖုန်းများကို ဆက်သွယ်ခေါ်ယူကာ မကြာခဏဆိုသလို လိမ်လည်ပြီး ငွေတောင်းသူများ
ရှိနေကြောင်းသိရသည်။
…… အခုနိုဝင်ဘာလဆန်း ၁၅ ရက်နေ့ ၊ နံနက် ၁၀ နာရီအချိန်လောက်မှာ
ကျွန်မတို့အိမ်က စီဒီအမ်အေ ဖုန်း ၀၉၄၇၁၃၁၁၇၉ ကို ဖုန်းဝင်လာပါတယ်။ ကျွန်မကလည်း အလုပ်မအားတဲ့
ကြားထဲကနေ ဖုန်းကို သွားကိုင် လိုက်တဲ့အခါမှာ ဖုန်းနံပါတ်ကိုကြည့်လိုက်တော့ ၀၉၇၃၁၃၉၃
ကနေ ၀င်လာတဲ့ဖုန်းဖြစ်တယ်ဆိုတာကို သိလိုက်ပါတယ်။ ဒါနဲ့ ဖုန်းခေါ်ခဲ့တဲ့သူက ကျွန်မကိုမေးပါတယ်။
ဘယ်ကလဲလို့ မေးပါတယ်။ ကျွန်မကလည်း သံဘိုကလို့ ပြောလိုက်ပါတယ်။ သံဘိုက ဘယ်မြို့နယ်ကလဲလို့
ပြန်မေးပါတယ်။ အင်းတော်မြို့နယ်ကလို့ ပြန်ဖြေ လိုက်ပါတယ်။ ဘဘက သမီးကို ဖုန်းခေါ်ရတဲ့အကြောင်းရင်းက
အခြားတော့မဟုတ်ပါဘူးလို့ ဖုန်းခေါ်သူက ပြန်ပြောခဲ့ပါတယ်။ သမီးက ဖုန်းမဲပေါက်နေလို့ အခုလိုခေါ်ပြောရတာဖြစ်ပါတယ်။
ဖုန်းကတော့ ဆက်သွယ်ရေး ရုံးတွေမှာ သွားထုတ်ရမှာဖြစ်တယ်လို့ ပြောပါတယ်။ ဒီဖုန်းတွေကို
သွားမထုတ်ခင်မှာ သမီးက ကံထူးရှင်ဖြစ်နေပါတယ်လို့ ထပ်ပြောလာခဲ့တယ်။ ဘာကြောင့်လဲလို့
ကျွန်မက ပြန်မေးလိုက်ပါတယ်။ ဖုန်းအလုံးရေ ၅၀၀၀ မှာ ဒီ စီဒီအမ်အေ ဖုန်းတွေကို ထုတ်ပေးတဲ့
ရုံးကနေ မဲနှိုက်တဲ့အခါမှာ သမီးရဲ့ဖုန်းက သိန်း ၈၀၀ ပေါက်တဲ့ လူနှစ်ဦးမှာ သမီးရဲ့ဖုန်းလဲပါတယ်။
သိန်း ၄၀၀ စီရမှာမို့ အမြတ်ခွန်အတွက် ကြိုသွင်းဖို့ရာ လောလောဆယ် သူများ တွေမသိခင် ငွေ
၁၆ သိန်းကျပ်ကို အခုနာရီဝက်အတွင်းမှာ ရန်ကုန်ကို ငွေအမြန်လွှဲခဲ့ပါ။ သမီးရဲ့ငွေ ၁၆ သိန်း
ရောက်လာတာနဲ့ နောက်ထပ်တစ်နာရီလောက်ဆိုရင် ငွေကျပ် သိန်း ၄၀၀ ကို သမီးရဲ့ထံကို ချက်ခြင်း
ပြန်လွှဲပေး မှာဖြစ်ပါတယ်လို့ ထပ်မံပြောခဲ့ပါတယ်။ ဒါနဲ့ကျွန်မကလည်း ဘာဖြစ်ဖြစ်ဆိုပြီးမှ
ငွေ ၁၆ သိန်းရရှိရေးအတွက် နန်းကင်ကျေးရွာက ဆန်စက်ပိုင်ရှင် မပြားချိုထံမှာ ဆင်း ၃ စပါး
တင်း ၃၀၀ ကို သွားရောင်းပါတယ်။ ရောင်းတဲ့ အခါမှာ မပြားချိုဆီမှာကလည်း ငွေက ၁၃ သိန်းပဲ
ရှိနေတော့ ကျွန်မဆီမှာက ငွေ တစ်သိန်းပါသွားတယ်။ ငွေ နှစ်သိန်း လိုနေတဲ့အခါမှာ မပြားချိုက
ကျွန်မကို ထပ်မေးပါတယ်။ မင်းက ဘာအရေးကြီးလို့လဲလို့ ပြောပါတယ်။ ကျွန်မကလည်း မပြောရဘူးဆိုလို့
ပေးတာပေးခဲ့စမ်းပါ မြန်မြန်လို့ပဲ ထပ်ပြောပါတယ်။ မပြားချိုအိမ်ကို ကျွန်မ ရောက်နေတုံးကို
ဖုန်းဝင်လာတော့ မပြားချိုက ကြားသွားလိုက်တဲ့အခါမှာ ဒါလူလိမ်တွေ သွားပြီးမှ ငွေမလွှဲနဲ့လို့
ပြောလာတဲ့အခါမှ ကျွန်မကလည်း သတိဝင်သွားတာဖြစ်ပါတယ်။ မပြားချိုကယ်လို့သာ ကျွန်မရဲ့ ငွေတွေ
မပါသွား ပါဘူး ….. ဟု အင်းတော်မြို့နယ် သံဘိုကျေးရွာ မ၀င်းမေက ပြောပြခဲ့သည်။
အင်းတော်မြို့နယ် အတွင်းရှိ အချို့ဖုန်းကိုင်ဆောင်သူများထံသို့
ဖုန်းမဲပေါက်သည်ဆိုပြီး လိမ်လည်ပြီးမှ ငွေတောင်းခံသူများ ရှိနေသည့်အတွက်ကြောင့် သတိထားရှောင်ရှားကြဖို့ရာ
လိုအပ်လျက်ရှိနေကြောင်း သိရသည်။
…… ကျွန်မဆီကိုရောက်လာတော့ မ၀င်းမေက ငွေရေတွက်တာကိုပဲ တုံတုံယင်ယင်နဲ့ဖြစ်နေတယ်။
ကျွန်မကလည်း ဘာအရေးကြီးတာလဲလို့ ထပ်ခါထပ်ခါ မေးတယ်။ သူကကျွန်မကို ပြန်မပြောဘူး။ ငွေ
၁၆ သိန်းကိုပဲ မြန်မြန်ပေးခဲ့ပါလို့ တောင်းနေတယ်။ ကျွန်မကလည်း ရှိနေတဲ့ ငွေ ၁၃ သိန်းကိုပဲ
သူ့ကိုပေးပြီး ကျန်တဲ့ ငွေကို ချေးပြီးမှ ပေးမယ်လို့ ကျွန်မရဲ့စပါးဝယ်လက်ထံကို ဖုန်းနဲ့ဆက်သွယ်နေတဲ့အခါမှာ
မ၀င်းမေဆီကို ရန်ကုန်က ကျော်ရဲသွင်ဆိုတဲ့ လူဆီကနေ ဖုန်းထပ်ဝင်လာတယ်။ မရောက်သေးဘူးလား
သမီး ၊ မြန်မြန်သွားပြီးမှ ငွေလွှဲ ဆိုတဲ့အသံကို ကြားလိုက်တော့ ကျွန်မလည်း မ၀င်းမေကို
အချိန်မှီတားမြစ်လိုက်နိုင်ပါတယ် …… ဟု အင်းတော်မြို့နယ် နန်းကင်ကျေးရွာမှ ဆန်စက်ပိုင်ရှင်
ဒေါ်ပြားချိုက ထပ်မံပြောပြခဲ့သည်။
အင်းတော်မြို့နယ်အတွင်း ရှိသော အနယ်နယ်အရပ်ရပ်ရှိ အချို့ဒေသများမှ
ဖုန်းများကို မဲပေါက်တယ် ဆိုပြီးမှ လိမ်လည်ပြီး ငွေတောင်းသူများရှိနေသည့်အတွက်ကြောင့်
ဖုန်းကိုင်ဆောင်သူများသည် ဖုန်းနှင့်ဆက်သွယ် ပြီး ငွေလိမ်တောင်းသူများကို သတိထားရှောင်ရှားဖို့ရာ
လိုအပ်လျက်ရှိနေကြောင်း သိရသည်။
No comments:
Post a Comment