အင်းတော်အင်းကြီးကို ဒေသခံကျေးရွာများနှင့် မြို့နယ်သက်ဆိုင်ရာများ စုပေါင်းထိန်းသိမ်း ဆောင်ရွက်ရန် လိုအပ်နေသေး

(နေကိုကို)

          မြန်မာနိုင်ငံအထက်ပိုင်းရှိ စစ်ကိုင်းတိုင်းဒေသကြီး ၊ ကသာခရိုင် ၊ အင်းတော်မြို့နယ်အတွင်းရှိသော အင်းတော်-ဗန်းမောက် သွားသည့် ကားလမ်း၏အနောက်အနီးတွင်ရှိသည့် အင်းတော်အင်းကြီးသည် အင်းတော်မြို့နယ်အတွင်းတွင်ရှိသော အင်းအနီးမှ အင်းဦး သက္ကယ်ကျင်းကျေးရွာ ၊ ပေပင်ကျေးရွာ ၊ နတ်မဟုတ်ကလေးကျေးရွာ ၊ အင်းရွာကျေးရွာ ၊ လက်ပံကုန်းကျေးရွာ ဒေသခံများနှင့် မြို့နယ် သက်ဆိုင်ရာများ အင်းတော်အင်းကြီးကို စုပေါင်းထိန်းသိမ်းရန် လိုအပ်လျက်ရှိနေကြောင်း သိရသည်။

          ….. အင်းတော်အင်းထဲကို ချောင်းပေါင်း ၂၀ ကျော် စီးဝင်လာတဲ့ အင်းဖြစ်တယ်။ အင်းတော်အင်းဟာ အရင်ကတော့ အလျား (၄)မိုင် ၊ အနံ(၂)မိုင် အကျုယ်အ၀န်းရှိတဲ့အင်းဖြစ်ပါတယ်။ ဒါပေမဲ့လည်း နှစ်ပေါင်းများစွာ ကြာလာတဲ့အခါမှာ အင်းတော်အင်းရဲ့ အလျားမိုင် (၂.၆၉)မိုင်ရှိပြီး အနံမှာ (၁.၇၉)မိုင်သာ ရှိတော့တယ်လို့ အင်းတော်မြို့ အတွင်းရှိ အင်းရဲ့အကျယ်အ၀န်း လေ့လာသုံးသပ်ထားတဲ့ ပညာရှင်တစ်ဦးထံမှ စုံစမ်းသိရှိရပါတယ်။ နောက်ပြီးတော့ မိုးရာသီကာလရောက်ရင် အင်းတော်အင်းရေဟာ ညစ်ငြမ်းမှုရေတွေ အတော်လေးစီးဝင်ပါတယ်။ ညစ်ငြမ်းမှုရေ ၀င်ရုံသာမကဘူး။ အင်းဦးသက္ကယ်ကျင်း ကျေးရွာရဲ့ ကမ်းစပ်ဖက်ကို ရေလှိုင်းပုတ်ခတ်မှုကြောင့် အင်းတော်အင်းထဲကို ချောင်းပေါင်းများစွာက မျှောပါလာတဲ့ ပုလင်းခွံတွေဟာ အင်းဘေး ကမ်းစပ်မှာ စုပုံပြီးသောင်တင်နေတယ်။ နောက်ပြီး အင်းတော်အင်းဟာလည်း အင်းအနီးမှာရှိတဲ့ ကျေးရွာဒေသခံတွေနဲ့ မြို့နယ်သက်ဆိုင်ရာတွေက စုပေါင်း ထိန်းသိမ်းစောင့်ရှောက်ဖို့ရာလည်း လိုအပ်နေပါသေးတယ်။ ဘာကြောင့်လဲဆိုတော့ အင်းအနီးမှာရှိတဲ့ အချို့ယာပိုင်ရှင်တွေ လယ်ပိုင်ရှင်တွေ အခင်း ပိုင်ရှင်တွေက မိမိတို့ဧရိယာအနီးမှာရှိတဲ့ အင်းကောလာတာကိုပဲ လိုချင်လိမ့်မယ်။ ဒါပေမဲ့ တကယ်တော့ ဒီအင်းကို စုပေါင်းစောင့်ရှောက်ထိန်းသိမ်းဖို့ရာက လူတိုင်းမှာ တာဝန်ရှိပါတယ်။ အင်းတော်အင်းဟာ ကျွန်တော်တို့ မြန်မာနိုင်ငံအတွင်းမှာဆိုရင် ယခုအချိန်အထိ ရေအသန့်ရှင်းဆုံး အင်းလို့ ဆိုရမှာဖြစ်ပါတယ်။ အခု နိုဝင်ဘာလ အတွင်းရောက်လာတဲ့အချိန်မှာ အင်းရေဟာ ကြည်လင်သန့်ရှင်းပြီး စိမ်းလဲ့နေတာကို တွေ့မြင်ကြရတယ်။ နောက်ပြီး အင်းရဲ့အကျယ်အ၀န်း ဧရိယာတွေကိုလည်း ယခုအချိန်အထိ စနစ်တကျ သတ်မှတ်ထားခြင်း မရှိသေး ပါဘူး။ ဒီလို အင်းရဲ့အကျယ်အ၀န်းဧရိယာ နယ်မြေကို စနစ်တကျ သတ်မှတ်ထားခြင်း မရှိသေးတော့ အင်းတော် အင်းရဲ့ သက်တမ်း ရေရှည်အခိုင်အမာ ရှိပြီး တည်တန့်ခိုင်မြဲဖို့ကို စုပေါင်းစောင့်ရှောက်မှသာလျှင် ပြည်ထောင်စု မြန်မာနိုင်ငံအတွက်ကော ကျွန်တော်တို့ စစ်ကိုင်းတိုင်းဒေသကြီးအတွက်ကော အင်းတော်မြို့နယ်အတွက်ကော အားလုံး အဆင်ပြေမှာဖြစ်သလို ဒေသခံတွေအတွက်လည်း ရေရှည် ကောင်းမွန်သွားမှာဖြစ်ပါတယ်….. ဟု အင်းတော်မြို့ခံတစ်ဦးက ပြောပြခဲ့သည်။

          အင်းတော်မြို့နယ်အတွင်းရှိ အင်းတော်အင်းကြီးသည် အင်းတော်မြို့နှင့် ၄ ဖာလုံခန့် အကွာအဝေးရှိသော အင်းဖြစ်ပြီး ယခင်နှစ်ကာလများက အလျား ၄ မိုင် အနံ ၂ မိုင် ရှိခဲ့သော်လည်း ယခုအခါတွင် အင်းကြီးမှာ တစ်နှစ်ထက်တစ်နှစ် တိမ်ကောမှုများ ရှိလာသည့်အတွက်ကြောင့် အင်း၏အလျားသည် ၄ မိုင်မရှိတော့သလို အင်း၏အနံအကျယ်အ၀န်းမှာလည်း ၂ မိုင်မရှိတော့ပဲ ကျဉ်းမြောင်းလာသည်ကို လေ့လာတွေ့ရှိရသည်။ ထို့အတွက်ကြောင့် အင်းတော်မြို့ခံအချို့တို့က အင်းတော်အင်းကြီး ချို့ယွင်းပျက်စီးမှုများ မြန်ဆန်လာမည်ကို စိုးရိမ်ပူပန်မှုများ ရှိနေကြသလို အဆိုပါအင်းကြီးကိုလည်း အင်းအနီးမှာရှိတဲ့ ကျေးရွာလေးရွာနှင့်မြို့ခံ သက်ဆိုင်ရာ တို့ပူးပေါင်းပြီးမှ စနစ်တကျ ထိန်းသိမ်းဆောင်ရွက်ရန် လိုအပ်လျက်ရှိနေသေးကြောင်း ဒေသခံအချို့တို့က သုံးသပ် ဝေဖန်လျက်ရှိနေကြကြောင်းသိရသည်။