မြန်မာ့မီးရထားတွဲများ၏ လိုအပ်ချက်များကို ပြုပြင်ဆောင်ရွက်သွားမည်

(ကိုမင်း-အင်းတော်)

          မန္တလေး-မြစ်ကြီးနား ရထားလမ်းပိုင်းသည် မီးရထားဖြင့် ခရီးသွားလာမှုများပြားသော ရထားလမ်းပိုင်း ဒေသဖြစ်သည်။ ထို့ကြောင်းရထားစီးခရီးသည်များ၏ လိုအပ်ချက်များကို ဖြည့်ဆည်းပေးနိုင်ရေးအတွက် စစ်ကိုင်းတိုင်းဒေသကြီး ၊ မြန်မာ့မီးရထား အမှတ်(၂) တိုင်းမှ လက်ထောက်အထွေထွေမန်နေဂျာ ဦးညိုဦး၏ တာဝန်ပေးချက်အရ ဦးဇော်လွင် ၊ လက်ထောက်မန်နေဂျာ (သွားလာရေး ၊ တိုင်း) အမှတ်(၂) တိုင်း ကောလင်းသည် အောက်တိုဘာ(၁၆)ရက်နေ့မှစ၍ စစ်ကိုင်းတိုင်းဒေသကြီးအတွင်း အမြန်စာပို့ ၊ လော်ကယ် ရထား စသည့်ဖြတ်သန်းရထားများကို လူစီးတွဲများကောင်းမကောင်း ၊ အိမ်သာသန့်ရှင်းရေးကောင်းမကောင်း ၊ အိမ်သာတံခါးဂျက်များ ကောင်းမကောင်း ၊ ရေမီးရရှိမှု ရှိ/မရှိ စသည်တို့ကို ရထားတစ်စီးခြင်း ၊ တွဲတစ်တွဲခြင်း အလိုက် စစ်ဆေးမှတ်တမ်းတင်၍ လိုအပ်ချက်များကို ပြုပြင်ဆောင်ရွက်သွားမည်ဖြစ်ကြောင်းကို ဦးဇော်လွင် လက်ထောက်မန်နေဂျာ (သွားလာရေး/တိုင်း) အမှတ်(၂) တိုင်း ကောလင်းက ပြောကြားခဲ့သည်။

          ထို့အပြင် မန္တလေး-မြစ်ကြီးနား လမ်းပိုင်းဘူတာများပေါ်တွင် အမြန်/စာပို့ရထားများ လူစီးတွဲတွင် ရေပြတ်လတ်မှု ရှိပါက ရေဖြည့်တင်းနိုင်သည့် ဘူတာမှာ နဘားဘူတာတစ်ခုတည်းသာရှိပြီး ရထားတွဲများသို့ ရေဖြည့်နိုင်ရေးအတွက် နဘားဘူတာရှိ ရေလှောက်ကန်ကြီးများသို့ ရေပေးနေသည့် နဘားကျေးရွာမှ ၁မိုင်ခွဲခန့် ကွာဝေးသည့် သဘာဝစိမ့်ရေကန်ကိုလည်း သန့်ရှင်းသပ်ရပ်မှုရှိအောင် ဆောင်ရွက်သွားမည်ဖြစ်ကြောင်း ၎င်းက ဆက်လက်ပြောကြားသည်။